Ajax vs United, finalja ‘e vogël’ evropiane

Pas mbylljes së pothuajse të gjitha ligave evropiane dhe me një verë pa gara madhore, përjashto Kupën e Konfederatave, dy ndeshjet e fundit që kanë vëmendjen më të madhe për sezonin 2016/2017 janë finalja e Europa Leagues dhe ajo e Champions Leagues.

E para prej tyre luhet në Stokholm nesër dhe kjo finale ‘e vogël’ evropiane, pasi që e madhja luhet më 3 qershor në Cardiff, përballë vendos dy gjigantë të futbollit evropian. Ajaxi, 5 herë fitues i Champions Leagues, rikthehet në një finale evropiane pas një kohe të gjatë, ndërsa aty përballë do ta ketë Manchester Unitedin e Jose Mourinhos, skuadër kjo që ka fituar të gjithë trofetë e mundshëm në futboll përveç Europa Leagues dhe këtë gjë e kërkon me çdo kusht në këtë finale. Gjithsesi, për Unitedin triumfi në këtë garë do të nënkuptonte kualifikim në Champions League, gjë që ka më tepër rëndësi sesa vetë ky trofe.

HISTORIA

Kjo është hera e pestë që këto dy skuadra ndeshen mes vete në gara evropiane.

Për herë të parë këto skuadra u takuan në Kupën UEFA në sezonin 1976/1977. Ajaxi e fitoi ndeshjen e parë në Holandë me rezultat 1-0, mirëpo United kualifikimin e arriti me fitoren 2-0 në ndeshjen e kthimit.

Përballja e dytë mes skuadrave erdhi në sezonin 2011/2012 në Europa League. Manchester Unitedi i Sir Alex Fergusonit kishte fituar 0-2 në Amsterdam me golat nga Ashley Young dhe Javier Hernandez, ndërsa ndeshja e dytë në Angli u fitua 1-2 nga Ajaxi, mirëpo ishte e pamjaftueshme për kualifikim, me Unitedin që vazhdoi tutje.

MUNGESAT

Kur jemi te mungesat, United është dukshëm më i hendikepuar. Për shkak të lëndimeve, te United mungojnë Zlatan Ibrahimovic, Luke Shaw, Marcos Rojo dhe Ashley Young, ndërsa i suspenduar është Eric Bailly. Sa i përket Ajaxit, i suspenduar për finale është Viergever, ndërsa i lënduar është Sinkgraven.

STATISTIKA

- United është i pamposhtur në 10 ndeshjet e fundit në Europa League (7 fitore, 3 barazime). Humbja e fundit erdhi nga Fenerbahçe me rezultat 2-1 në fazën e grupeve.

- Ajaxi është pa fitore në 6 ndeshjet e fundit evropiane jashtë Amsterdam Arenas (3 barazime, 3 humbje).

- Ajaxi ka më së shumti goditje në portën kundërshtare nga të gjitha skuadrat e Europa Ligës (95). United ka 76 gjuajtje në portë këtë sezon të Europa Ligës.

- Ajaxi është ndëshkuar me 45 kartonë të verdhë dhe 4 të kuq sivjet në Europa League, më shumë se çdo skuadër tjetër. United ka marrë 21 të verdhë dhe 2 të kuq.

- Jose Mourinho është takuar 6 herë me skuadrën e Ajaxit dhe ka 6 fitore me golaverazh 20-2.

ZLATAN IBRAHIMOVIC

Pa dyshim se për t’u përmendur para këtij takimi është suedezi Zlatan Ibrahimovic, i cili mund të konsiderohet njeriu më i pafat nga e gjithë kjo ngjarje. Suedezi në fjalë ka luajtur për të dyja skuadrat finaliste, Ajaxin dhe Manchester Unitedin, ndërsa për më tepër edhe finalja zhvillohet në shtëpinë e tij, Suedinë, ndërsa është pikërisht Zlatan ai që mungon për shkak të lëndimit. Përveç Zlatanit, edhe dy lojtarë momental të Manchester Unitedit më parë ishin të Ajaxit. Bëhet fjalë për mbrojtësit Daley Blind the Timothy Fosu-Mensah.