Albert Dabiqaj me hat-trick përmbys Llapin dhe përforcon Dritën në krye

Mesfushori qendror i Dritës, Albert Dabiqaj, ka dalë në skenë në pjesë të dytë të ndeshjes së sotme Drita-Llapi dhe ka shënuar tre herë në portën kundërshtare për të përmbysur Llapin dhe për t’ia sjellë Dritës fitoren 3-1 [Albert Dabiqaj 69’, 75’, 90’+2 - Blend Baftiu 22’] për ta ngritur dallimin ndaj ndjekësve në renditjen tabelare.

Llapi, të cilëve pikët u duhen shumë për shkak se janë në zonë të rrezikshme të renditjes tabelare, nisi më mirë ndeshjen, krijoi dhe arriti epërsinë me ish-lojtarin e Dritës, Blend Baftiu. Baftiu shënoi me kokë nga afërsia pasi që Diar Vokrri krosoi nga e djathta. Dominimi me posedim të topit i Llapit vazhdoi, por pa raste konkrete, hiç një shut drejt portës.

E në pjesë të dytë, saktësisht kur mbetën afërsisht edhe 20 minuta lojë në skenë doli Dabiqaj. Ky, së pari shënoi për barazim, pastaj epërsi e më pas edhe për sigurimin e fitores, duke u bërë njeriu i ndeshjes, e nesër pritet që të merr edhe çmimin e Yllit të javës nga FFK.

Dabiqaj së pari shënoi nga afërsia, kur mbrojtja e Llapit s’reagoi si duhet. Më pas pranoi top nga Besnik Krasniqi dhe me kokë dha avantazh, kurse kur tashmë Llapi kërkonte gjithçka në kohën shtesë, vendasit rrëmbejnë topin e pasiguruar mirë nga mbrojtja që kishte dalë pranë mesit të fushës për të shënuar me tre kombinime për 3-1 përfundimtare.

TABELA AKTUALE

Dominimi i Dritës në pjesë të dytë nisi më parë, kur Melos Zenunaj që kishte hyrë si zëvendësues shënoi. Mirëpo, pas 10 minutash rishikimi të rastit nga dhoma e VAR-it dhe ftesës për konfirmim të dyshimit për faul nga Genc Nuza, ky i fundit e anuloi golin për shkak të një fauli në zonë të bërë të Arb Manajt ndaj Ilir Blakçorit, para se topi të arrinte te Zenunaj. Kjo nuk demoralizoi Dritën të cilët fuqishëm vazhduan dhe arritën fitoren në fund.

Gjatë tërë dominimit të Dritës në pjesë të dytë, Llapi kishte një mundësi të vetme pak më të mirë, kur Valmir Veliu tentoi nga kufiri i zonës së rreptësisë, por goditja e tij shkoi mbi portë.

Me këtë fitore, Drita lidere tash ka 31 pikë nga 14 ndeshje, duke qëndruar me 5 pikë mbi kampionin aktual dhe ndjekësin e parë të saj, Ballkanin. Llapi është në zonë të barazhit, i teti në renditje me 16 pikë, ndërsa ka pësuar humbjen e gjashtë sezonale sot.