Askush s’mund të na fitojë

Ai mund të kërcejë. Mund të luaj mbrojtje. Ai asiston për bashkëlojtarët. Është një organizator i gjatë, prandaj këto gjëra janë ato që i bën në konsistencë. 

Harouna Mutombo, 196 centimetra i gjatë, është shumë më pak i njohur sesa xhaxhai i tij i famshëm, Dikembe, por ardhja e tij në Kosovë, ku për herë të parë luan si profesionist, pritet të jetë ngritje e madhe në karrierën e tij. Ai luan si zëvendësues në organizim dhe në mbrojtje, sipas nevojës. Me mesatare prej 16.4 minutash për ndeshje, 7.3 pikësh, 4.6 asistimesh dhe 4 kërcime – ai pret të merr pjesë në Ligën Verore të NBA (NBA Summer League) dhe prej aty të bëhet edhe më i mirë. 

Borozani: Peja ka përfunduar stinorin si lidere, ndërsa çka janë pritjet tuaja para Final Four të Kupës dhe Play-Offit?! 

Mutombo: Së pari ju falenderoj për intervistën. Ne presim fitore. Do të jenë dy ndeshje të vështira, por si ekip ne e ndjejmë se askush s’mund të na fitojë kur luajmë bashkërisht. 

Borozani: Si po e shihni ligën e basketbollit kosovar në përgjithësi?! 

Mutombo: Shikoni, ky është stinori im i parë si basketbollist profesionist. Këtë shumica nuk e dinë. Unë jam 22 vjeçar dhe më parë kam luajtur vetëm në ligën e zhvillimit për NBA, kështu që është një basketboll krejtësisht tjetër dhe s’mund të bëj krahasime. 

Borozani: Basketbollisti më i mirë në BKT Superligë, kundërshtari më i vështirë?! 

Mutombo: Me bashkëlojtarin tim, Dardanin s’ka. Ai është më i miri këtu dhe shyqyr që s’e kam kundërshtarë. Kam parë shumë lojtarë në NBA, por ta dini që Dardani është i mirë me top. Po mësoj shumë nga ai për mbrojtje dhe thjeshtë Dardani po më ndihmon të zhvillohem. 

Borozani: Peja, ekipi dhe qyteti…

Mutombo: Po, qyteti është shumë i mirë. S’është Amerikë dhe ky është vendi im i parë ku luaj profesionalisht, prandaj nuk është vend i keq për të filluar me basketboll. Njerëzit janë të shoqërueshëm dhe gjithmonë kërkojnë të ndihmojnë. Ekipi është i madh, kemi veteran dhe mund të mësosh shumë nga ata. Kemi basketbollistë nga kampi i NBA-së, kemi basketbollistë nga Kampionatet Europiane, kështu që mund të them se ekipi ka gjithçka dhe llojllojshmëri lojtarësh që mund të ndihmojnë si brenda ashtu edhe jashtë palestrës. 

Borozani: Çka bën Mutombo në kohë të lirë?! 

Mutombo: Bilardo luaj shumë. Është një vend afër shtëpisë ku banoj dhe kohën e lirë e kalojë aty. Aty ka edhe PS 3 dhe pishinë, kështu që këtu mbushem me energji. 

Mutombo do të del sonte në palestrën sportive Sezai Surroi të Prizrenit, për t’u përballur me Sigkos Bashkimin në gjysmëfinale të Final Fourit. Fituesi i kësaj ndeshjeje luan me Sigal Prishtinën në finale, e cila mposhti Trepçën (mbrojtësen e titullit) dje.