Auba shumë afër Arsenalit

Sulmuesi i Borussia Dortmundit, Pierre-Emerick Aubameyang, është shumë afër që të bëhet lojtar i ri i Arsenalit.

Mediat gjermane kanë raportuar sot se ekipet janë dakorduar për dëmshpërblimin e lojtarit dhe tashmë priten vetëm çështjet tjera procedurale dhe kushtet personale për gabonezin 28 vjeç.

Sipas Bild-it gjerman, Arsenal do të paguajë 60 milionë funta në arkën e Dortmundit, afro 68 milionë euro. Aubameyang do të jetë zëvendësues i kilianit të larguar, Alexis Sanchez, që mori rrugë drejt Manchester Unitedit ditë më parë.

Historia e Aubemayangut në futbollin europian është interesante. Ai ka qenë si i ri lojtar i Milanit, ku nuk u pëlqye. Ai u huazua nga Milan për vite me radhë në ekipet e Ligue 2 të Francës, derisa St Etienne e blen për 1.8 milionë euro në vitin 2012.

Në St Etienne gabonezi shpërthen për dy stinorë radhazi me 10 dhe 19 gola për stinor, ku Dortmund e blen për 13 milionë euro.

Prej atëherë (2013/14) Aubameyang nuk ka stinor që ka shënuar nën 13 gola vetëm në ligë. Ndërsa me pjekuri, ai u bë edhe më i mirë. Në stinorin 2015/16 shënoi 25 herë në Bundesligë, e në 2016/17 plotë 31 herë.

Këtë stinor ai ka shënuar 13 gola në 16 paraqitje për verdhezinjtë e Dortmundit dhe në ditët e fundit të afatit kalimtar të janarit pritet të ndërrojë ambient - të shkojë drejt Arsenalit.