Bardhi Rexha nuk vazhdon me Rahovecin

Basketbollisti nga Rahoveci, Bardhi Rexha, ka vendosur që të mos vazhdojë me klubin e tij të deritashëm KB Rahoveci.

Ai përmes një njoftimi në Facebook ka bërë të ditur se ka marr vendim për një rrugë të re në karrierën e tij dhe projekti i KB Rahoveci 2021/22 nuk e përfshin atë, duke mbetur lojtar i ri.

“Dua t’ju njoftojë se kam vendosur të marr rrugëtim të ri në karrierën time. Arsyeja e këtij vendimi është sepse projekti basketbollistik i KB Rahoveci për sezonin 2021/22 nuk më përfshin mua. E vetmja gjë që jam i interesuar është basketbolli dhe vetëm basketbolli. Andaj si lojtar i lirë konfirmoj se do të zgjedh projektin basketbollistik më ideal për mua që të zhvillohem si lojtar ashtu siç kam ëndërruar gjithmonë, t’i bëj krenarë të gjithë,” ka shkruar ndër të tjera Rexha në postimin e tij.

Në fund, ai gjithashtu ka bërë të ditur se do të takohen sërish me klubin e tij, duke mos e mbyllur kështu derën e klubit të tij amë.

Derisa Rexha të konfirmojë skuadrën e tij të re, Rahoveci në anën tjetër ka konfirmuar pjesëmarrjen në Ligën Unike që do të thotë se klubi përveç garave në Superligë e Kupë të Kosovës do të merr pjesë edhe në ligën mbarëkombëtare ku përfshihen ekipet nga Kosova dhe Shqipëria.