Bashkë, për fitore

Pesë xhiro të rregullta, katër humbje dhe një tjetër ku Peja pushoi. Ndeshjet e humbura në minutat e fundit, ndërsa ajo e xhiros së fundit, vetëm pas vazhdimeve. Peja ende mbetet pa fitore në Balkan League. 

“Pikët në tabelë nuk pasqyrojnë forcën reale të klubit tonë. Të gjitha ndeshjet janë humbur në mungesë të fatit ose koncentrimit në minutat e fundit të ndeshjes. Sonte presim fitoren e parë, jemi në formë të mirë dhe duam t’ia bëjmë sefte në Karagaç, t’i gëzohemi fitores së parë me tifozët tonë,” ka thënë kryetari i klubit pejan, Art Gashi, në një prononcim për Borozani.com para ndeshjes së sotme. 

Ekipi i Daniel Lutzit, Peja, ka arritur që të shënojë fitore të madhe ndaj Sigal Prishtinës në kuadër të Superligës në fundjavë. Kjo u ka dhënë atyre moral të madh para kësaj ndeshjeje, mirëpo gjithashtu duhet të llogarisin edhe në lodhje për shkak të ndeshjes derbi. 

Peja pas ndeshjes me Craiovën sonte, do të luajë përsëri në Karagaç javën tjetër kur takohet me ekipin malazias, Teodo. 

Tabela aktuale.