Bashkimi mposht lideren me mbi 40 pikë dallim!

Skuadra e femrave të Bashkimit ka vazhduar me formën e shkëlqyeshme në pranverë, duke shënuar edhe fitoren e radhës.

Kësaj radhe, ekipi prizrenas shënoi fitore dhe atë të thellë ndaj Penzës së Pejës, që është lidere e Ligës së Femrave.

Trajnerja e Bashkimit, Fëllanza Balluku, po vazhdon me ritmin e fitoreve në pjesën e dytë të stinorit prej se erdhën dy amerikanet në ekip dhe femrat e Bashkimit po duken të pandalshme.

TABELA AKTUALE E LIGËS SË FEMRAVE

Tashmë ekipi prizrenas ka renditur vetëm fitore në pranverë. E gjashta me radhë në pjesën e dytë të stinorit dhe e nënta me radhë në krejt stinorin, prej se kanë humbur nga Penza në nëntor 2017.

Bashkimi fitoi me 42 pikë dallim këtë ndeshje, për përfundimtaren 98-56, derisa tre basketbolliste të ekipit nuk pushuan fare, duke luajtur për 40 minuta në lojë.

PERFORMANCAT INDIVIDUALE

Khadija Brown përfundoi ndeshjen me triple-double prej 31 pikëve, 13 asistimeve dhe 11 kërcimeve.

Anastasia Williams luajti me double-double prej 27 pikëve dhe 11 kërcimeve, ndërsa Aulona Muhadri gjithashtu kreu ndeshjen me double-double duke shënuar 16 pikë e 19 kërcime në fitore.

Në anën tjetër, te Penza vetëm dy vajza arritën të shënojnë pikë dyshifrore. Saranda Daci shënoi 16 pikë e 14 kërcime, ndërsa Filloreta Krasniqi shtoi 15 të tjera në ndeshje.

BILANCI AKTUAL

Pas këtij dueli, Penza ka bilanc 13-2, ndërsa Bashkimi 12-3.