Bavcic dhe Trajkovski e nisin me humbje Eurobasketin

Dy basketbollistët të cilët në stinorin e kaluar ishin ndër bartësit e lojës së Sigal Prishtinës, boshnjaku Edin Bavcic dhe maqedonasi Bojan Trajkovski, kanë pësuar humbje në ndeshjet e tyre të para në Eurobasket.

Bavcic në ndeshjen ndërmjet Polonisë dhe Bosnjës e Hercegovinës, e filloi ndeshjen nga pesëshja e parë, derisa për 20 minuta sa mbeti në fushë regjistroi 5 kërcime dhe 2 asistime, për të qenë i pamjaftueshëm për ta shpëtuar skuadrën e tij nga humbja që u mposht me rezultat 68-64.

Në anën tjetër, Maqedonia e Bojan Trajkovskit u tregua e plogësht përballë Greqisë duke u mposhtur me 20 pikë disavantazh 65-85. Trajkovski sikurse edhe Bavcic e nisi ndeshjen nga pesëshja e parë, ndërsa e përmbylli ate me 6 pikë dhe 3 kërcime.

Serbia kalon Spanjën

Në ndeshjen kryesore të ditës së parë të Eurobasketit që po organizohet në katër shtete të ndryshme të Europës (Kroaci, Francë, Gjermani dhe Letoni) u përballën dy superfuqi europiane të basketbollit, Spanja dhe Serbia.

Në fund fitores iu gëzua Serbia që triumfoi me rezultat 70-80, derisa Spanja u tregua e pafuqishme, pasi që në këtë kampionat po paraqitet me mungesa të shumta.

Nemanja Bjelica ishte më i miri tek serbët duke shënuar double-double me 24 pikë dhe 10 kërcime, kurse te Spanja u dallua Pau Gasol me 16 pikë, 5 kërcime dhe 4 bllokada.

Rezultatet e ditës