Besa mposht përsëri Vëllaznimin

Besa ka arritur që të shënojë fitore të ngushtë ndaj Vëllaznimit sonte në Karagaç për të regjistruar fitoren e dytë të stinorit dhe për tu barazuar me kundërshtarin e sotëm në tabelë. 

Me fitoren e Besës, tashmë tre skuadra të pjesës së poshtme të tabelës kanë bilanc 2 fitore e 5 humbje, me të cilin bilanc e përfundojnë ciklini e parë të stinorit. 

Besa ia nisi më mirë ndeshjes, duke e fituar çerekun e parë, me lojë të mirë të Arian Qallakut dhe Shawntez Pattersonit. 

Mirëpo ekipi i Jeton Nixhës arrin të këndellet në vazhdim dhe i shkakton telashe pejanëve, duke marrë epërsinë pas çerekut të tretë, në të cilin çerek Besa shënon vetëm 7 pikë! 

Sidoqoftë, në fund, ekipi i Fabian Gjukës ka arritur të përmbahet dhe ka arritur të shënojë fitore 67-64. 

Kjo ka qenë fitorja e dytë e Besës në këtë stinor, derisa po ky ekip pejan eliminoi edhe nga Kupa e Kosovës Vëllaznimin javë më parë. 

Shawntez Patterson ka qenë lojtari më i dalluar i ndeshjes te ekipi fitues sonte me double-double prej 23 pikëve dhe 12 kërcimeve, derisa atij i ndihmuan edhe Ummar Shannon me 18 pikë e 7 asistime dhe Arian Qallaku, që shënoi 11 pikë tjera në fitoren e madhe për Besën. 

Te Vëllaznimi, si zakonisht Dino Hodzic ka qenë më i dalluari. Hodzic shënoi 21 pikë e 12 kërcime, double-double i vetëm edhe te gjakovarët sonte, derisa u ndihmua nga Besnik Azemi me 18 dhe Mario Hajdic me 14 pikë të tjera të shënuara. 

Përforcimi i fundit i Vëllaznimit, Phil Brooks, ka luajtur vetëm gjysmën e ndeshjes (pak mbi 20 minuta), duke kontribuuar me 7 asistime dhe 2 kërcime për bashkëlojtarët, derisa nuk shënoi asnjë pikë. 

REZULTATET, TABELA AKTUALE

Statistikat ekipore:

	Besa	Vëllaznimi
Çereku i parë	23	18
Çereku i dytë	14	16
Çereku i tretë	7	13
Çereku i katërt	23	17
Kërcime	32	34
Asistime	15	20
Bllokada	0	1
Topa të vjedhur	6	7
Topa të humbur	11	17
Tentime për tre pikë	7/24	5/19
Tentime nga loja	25/60	27/63
Tentime nga gjuajtjet e lira	10/19	5/9

Statistikat individuale te Besa

1	Shawntez Patterson	23 pikë	12 kërcime	1 asistim
2	Umar Shannon	18 pikë	7 asistime	2 kërcime
3	Arian Qallaku	11 pikë	3 kërcime	3 asistime
4	Dominique Scales	8 pikë	4 kërcime
5	Sami Hajzeri	4 pikë	3 kërcime	1 asistim
6	Beqë Kovaqi	3 pikë	3 kërcime	1 asistim

Statistikat individuale te Vëllaznimi

1	Dino Hodzic	21 pikë	12 kërcime	7 asistime
2	Besnik Azemi	18 pikë	5 kërcime
3	Marijo Hajdic	14 pikë	6 kërcime	5 asistime
4	Korab Prekazi	4 pikë	7 kërcime	1 asistim
5	Matteo Juricic	3 pikë
6	Imer Tahiri	2 pikë	1 kërcim
7	Qëndrim Ajazaj	2 pikë	1 kërcim