PARA NDESHJES: RAHOVECI-YLLI
Beteja për Play-Off
18 March, 2018 @12:06
Dy skuadrat që po kërkojnë Play-Offin këtë stinor, e Rahoveci të parën në histori të klubit, dhe të dyja janë afër ta arrijnë këtë, Rahoveci dhe Ylli, do të ndeshen sonte në Shani Nushi të Gjakovës.
Në mungesë të palestrës së tyre, vreshtarët presin që të mbushin palestrën e Gjakovës, për të krijuar edhe përkrahje të madhe për klubin para derbit të ditës.
Sa i përket dueleve të këtij stinori në Superligë, Rahoveci ka fituar të dy përballjet e pjesës vjeshtore.
DUELET E DERITASHME
Më 7 tetor 2017, Rahoveci mposhti Yllin në Suharekës, 80-81. Në këtë ndeshje për vreshtarët kishte shkëlqyer Kyle Sovine me 26 pikë e 13 kërcime në fitore.
Më pas, më 11 nëntor, vreshtarët triumfuan edhe në cilësinë e vendasit. 91-84 ishte rezultati, derisa Xavier Newson kishte shënuar 24 pikë për ekipin e Rahovecit në fitore.
Ndërsa në duelin e parë të pjesës së dytë të stinorit Ylli u revanshua, duke dalë triumfues si vendas. Arif Mehmetaj me 26, Artin Gashi dhe Mike Harmon me nga 25 kishin qenë motorët e ekipit në fitoren, 99-86.
BILANCI
Rahoveci ka epërsi 2-1 ndaj Yllit në duelet e ndërmjetme këtë stinor.
Nëse fiton Ylli bëhen 2-2 dhe shikohet koshaverazhi në rast të bilancit të barabartë të skuadrave në fund të stinorit. Ndërsa nëse fiton Rahoveci, në rast të bilancit të barabartë, do të ketë përparësi për t’u ngjitur një pozitë mbi.
Ndeshja që luhet sonte pritet të ketë interesim të madh për shkak të rivalitet të skuadrave, ndërsa nis në ora 19:30.
RENDITJA
Aktualisht në klasifikim, Ylli është mbi Rahovecin. Si i treti në renditje, Ylli ka bilanc 13-9, ndërsa Rahoveci i katërt ka bilanc 12-10.
