Blajic dhe Erceg, përforcimet e Bashkimit

Skudra e Bashkimit nga Prizreni ka arritur marrëveshje në parim me basktbollistët kroat, Josip Blajic dhe Dino Erceg. 

Dyshja kroate dje gjatë ditës është parë në qytetin e vjetër të Kosovës, duke shëtitur me zyrtarë të klubit, ndërsa menaxheri Arlind Kaçaniku, paralajmëron edhe përforcime tjera posa të përfundohet zyrtarisht marrëveshja me sponzorin e klubit. 

Blajic luan në pozitën një dhe është i gjatë 192 centimetra. Së fundi ai ka luajtur me skuadrën kroate Djuro Djakovic, që ka qenë pjesë e ligës ballkanike stinorin e kaluar. Ndërsa përveç kësaj ai ka bërë karrierë edhe në skuadra si Kvarner, Cibonë dhe Alkar. Blajic është 26 vjeçar. 

Në anën tjetër Dino Erceg është basketbollist që luan në pozitën katër. Erceg është 28 vjeç dhe së fundi ka luajtur për ekipin e Apollon të Greqisë, derisa ka bërë karrierë edhe në Rueil të Francës dhe Miercurea të Rumanisë, para se dilte nga Kroacia. 

Për ndryshe, dy përforcimet e ri të Bashkimit njihen mirë me njëri tjetrin, pasi që në stinorin 2010/11 kanë qenë bashkëlojtar te skuadra kroate, Alkar Sinj.

Kaçaniku ka paralajmëruar edhe përforcime tjera pas dyshes kroate, derisa gjithashtu Bashkimi është në kërkim edhe të disa lojtarëve vendor që do të mund të mbulojnë pozitat e zbrazta në ekip.