Boris Kurtovic te Studenti

Ekipi i krijuar vitin e kaluar Studenti nga Peja që ka arritur për një stinor të futet në mesin e skuadrave më të mira të basketbollit kosovar, ka nënshkruar me trajnerin e famshëm kroat, Boris Kurtovic. 

“Nuk ka qenë lehtë të bindet një trajner me emër si Kurtovic. Trajneri që ka arritur të zë vendin e tretë në botë me Kroacinë U-19 në vitin 2010, si dhe trajner i Splitit, për shkak të raporteve të shkëlqyera ka pranuar të kthehet në qytetin ku ka kujtime shumë të mira - Pejë,” ka thënë kryetari i klubit Studenti, Arbër Elshani. 

Kurtovic ka qenë njeriu që pat bërë një kohë KB Dukagjinin kampione të Kosovës në basketboll, kur luhej Liga Profesioniste e Basketbollit.

“Ai do të arrij zyrtarisht te ekipi i tij i ri më 9 shtator, kur edhe do t’ia nis punës,” ka shtuar Elshani. 

Me ardhjen e trajnerit Kurtovic te Studenti, ky ekip i ri tashmë mund të thuhet që ka trajnerin më me famë dhe më të suksesshëm nga të gjitha skuadrat tjera të ETC Superligës.