Çerekfinalet e Euroligës: Panathinaikos – Fenerbahçe

Në këtë duel favoriti mungon. Feneri ka dëshmuar se fiton në çdo fushë, por Pana nuk pëson në Athinë. Parashikimi: 3-2 apo 2-3

Në duelin e më të afërmve në tabelë, të katërtit Panathinaikos dhe të pestës Fenerbahçe, do të ballafaqohemi me duelin e të njohshmëve të vjetër. Trajneri i stambollasve, Željko Obradović, përballet me ekipin të cilin e udhëhoqi për 13 vite dhe me të cilin fitoi 5 tituj kampioni të Evropës.

Grekët filluan në marsh të ulët rrugëtimin duke pësuar 4 herë në 8 ndeshjet e fundit. Mirëpo, tok me Efesin, qenë ekipet që në ndeshjet e fundit shënuan fitore radhazi, madje grekët arritën deri në pozitën e katërt. Se Athina është terren i nxehtë dëshmon edhe më tepër se Panathinaikosi në shtëpi ka pësuar vetëm një humbje gjatë sezonit të rregullt (edhe atë ndaj rivalit të përbetuar lokal).

Pas përshëndetjes nga Diamantidisi në fillim të stinorit, Nick Calathes u vendos gradualisht në pozitën e krijuesit të lojës dhe tok me Chris Singletonin u bënë nga dyshet e respektuara të ligës. Mike Jamesi shkëlqeu në ndeshjet e fundit duke arritur mesatare prej 12,9 pikësh, 3 asistimesh dhe 2,1 kërcimesh.

EUROLEAGUE PLAYOFF

Panathinaikosi për herë të parë pas 2012-s e ka në dorë avantazhin e fushës. Në po të njëjtin vit ka qenë edhe për herë të fundit në play-off, në udhëheqjen tanimë të trajnerit kundërshtar, Obradovićit.

Edhe pse ndër favoritët kryesorë, Fenerbahçeja pati shumë oscilime gjatë stinorit. Edhe pse me përjashtim të ardhjes së Nunnallyt nuk pati ndryshime në kompozicion, oscilimit i kontribuuan në masë të madhe lëndimet e shpeshta.

Ekpe Udoh shpesh pauzoi për shkak të lëndimit të belit, megjithatë është kërcyesi (7,7 për ndeshje) dhe bllokuesi (2,4 për ndeshje) më i mirë i ligës. Bogdan Bogdanovići dy herë pësoi lëndim të kyçit të këmbës dhe mungoi në pothuajse gjysmën e ndeshjeve, megjithatë paraqitet si shënuesi më i mirë i ekipit (13,6 pikë për ndeshje). Kostas Sloukasi sapo u kthye nga lëndimi dhe nuk dihet sa i gatshëm do të jetë.

Mbetet shpresa e aziatikëve të Stambollit që të gjitha këto pjesë do të jenë disi në optimumin e tyre dhe falë qëndrimit në kolektiv, tanimë në vitin e dytë, Fenerbahçeja do të jetë në gjendje që të arrijë te Final-fouri i tretë rresht.

Para dy vitesh Fenerbahçeja u ndal në gjysmëfinale. Vjet pësoi në finale dhe po qe se i besohet përparimit progresiv, sivjet duhet të kurorëzohet me trofe. Këtë herë, për herë të parë avantazhi nuk është te Fenerbahçeja dhe për herë të parë pas 5 vitesh, atë e ka Panathinaikosi. Në duelin e dytë greko-turk, favoriti dhe fituesi është edhe më i vështirë të përcaktohet. Me gjasë të madhe do ta shohim ndoshta ndeshjen e pestë vendimtare. Bazuar në listën e lojtarëve, Fenerbahçeja është më afër gjysmëfinales, por bazuar në performansën sezonale, duhet të thuhet e kundërta. Megjithatë, kjo përballje garanton se do të jetë dueli më interesant çerekfinal.