Çereku i tretë, vendimtar

Sigkos Bashkimi ka arritur që të shënojë fitore të madhe ndaj Sigal Prishtinës në ndeshjen e dytë gjysmëfinale të Play-Offit dhe tani finalisti do të vendoset në ndeshjen e tretë përfundimtare që do të luhet në fundjavë në Prishtinë. 

Prizrenasit dallimin kryesor në ndeshje e kanë bërë në çerekun e tretë, atëherë kur zakonisht Sigal Prishtina është më e fortë. Në këtë çerek portkallët dominuan plotësisht duke fituar me 11 pikë epërsi e që në fund të ndeshjes, kjo epërsi doli të jetë vendimtare për të qenë fitues i ndeshjes. 

Fituesja e Kupës së Kosovës, Sigal Prishtina, edhe pse në çerekun e fundit dërrmoi Bashkimin, gabimet e shumta në fund nga të dyja palët, sa për shkak të lodhjes, sa për shkak të rëndësisë së ndeshjes - bënë fitues Bashkimin në fund. 

Në fakt ekipi i Ahmet Kandemirit hyri në çerekun e fundit me një seri prej 10-0, por prizrenasit u kthjellën shpejtë me një seri prej 5-0 që nivelizoi gjithçka në fund. 

Organizatori amerikan, Kejuan Johnson, ka qenë koshashënuesi më i mirë te prizrenasit. Johnson shënoi 18 pikë dhe i ndihmoi shokëve të skuadrës me tetë asistime. Përveç tij, pikë dyshifrore shënuan edhe qendra amerikane, Mark Dawson, që regjistroi double-double prej 13 pikëve dhe 11 kërcimeve, pastaj Muhamed Hasani 13 pikë dhe Rokas Uzas 12 pikë. 

Në anën tjetër te Sigal Prishtina u dalluan vëllezërit Rugova, ku Fisniku regjistroi double-double prej 20 pikëve dhe 14 kërcimeve, derisa Graniti shënoi 16 pikë. 

Sa i përket gjuajtjeve për tre pikë Muhamed Hasani ka shënuar sonte tre herë jashtë vijës 6.75 metra, ndërsa Rokas Uzas dy herë - e te Prishtina vetëm Granit Rgova ka shënuar mbi një treshe - dy herë. 

Sigkos Bashkimi tash ka barazuar serinë gjysmëfinale në 1-1 dhe ndeshja që do të përcaktojë finalistin do të luhet në Prishtinë, ku pritet të jetë një ndeshje mjaft interesante.

Skema e Play-Offit

PLAY OFF - GJYSMËFINALJA - NDESHJA II

STATISTIKAT INDIVIDUALE TË BASHKIMIT:

STATISTIKAT INDIVIDUALE TË PRISHTINËS: