Craiova përforcohet me kroatin Babic

Skuadra rumune pjesëmarrëse në Balkan League, Craiova, është përforcuar së fundi me organizatorin kroat, Petar Babic. 

Babic, 28 vjeçar deri më tani nuk ka bërë karrierë jashtë vendit dhe këtë fundjavë ka luajtur ndeshjen e parë për skuadrën rumune duke shënuar 12 pikë për 24 minuta sa qëndroi në parket. 

Craiova ishte mposhtur nga Peja në kuadër të Balkan League në Karagaç dhe i kishte shkaktuar disfatë Sigal Prishtinës në Pallatin e Rinisë dhe të Sporteve. 

Ai ka djersitur fanellat e ekipeve kroate Rudes, Zrinjevac dhe Zagreb, para se të regjistrohet si përforcim i ri në BIBL për Craiovën. Me Zagrebin Babic ka luajtur edhe në kupa europiane dhe rumunët presin përvojën e tij të shfaqet në BIBL. 

Craiova pret Pejën në Rumani në fund të këtij muaji. Aktualisht ekipi rumun gjindet në pozitën e gjashtë të Balkan League me 14 pikë.