Dardan Berisha: 100% angazhim për fitore

Basketbollisti i rikthyer te Sigal Prishtina, Dardan Berisha, është shprehur që ekipi është përgatitur mirë për përballjet e Ligës së Kampionëve.

Sigal Prishtina në raundin e parë kualifikues ndeshet me ekipin bellorus, Tsmoki Minsk, ndërsa bardhekaltërit kampionë shpresojnë që të shkruajnë historinë e klubit me fitore në këtë ndeshje.

Të përgatitur për fitore - DARDAN BERISHA

“Definitivisht jemi përgatitur mjaft mirë për ndeshjen historike, që është shumë me rëndësi për klubin tonë, por edhe sportin në përgjithësi të Kosovës,” ka thënë Dardan Berisha fillimisht, në konferencën e sotme për shtyp, para ndeshjes ndaj ekipit bellorus.

“Flas në emër të lojtarëve, kemi me u angazhu 100% për të fituar këtë ndeshje. Posaçërisht të parën që është shumë me rëndësi për ne,” ka treguar Dardani, që është edhe kapiteni i reprezentacionit të Kosovës.

Duam ta shkruajmë historinë - DARDAN BERISHA

Snajperi Berisha gjithashtu ka bërë të ditur se lojtarët dhe ekipi presin që numri i shikuesve të jetë shumë i madh në ndeshje, për të shkruar historinë së bashku.

“Pres që të ketë shumë shikues në ndeshje. Plisat të jenë aty, adhurues nga cilido vend, jeni lojtar i gjashtë yni. Jemi të motivuar për këtë ndeshje, për këtë arsye edhe kam ardhur në Prishtinë. Duam ta shkruajmë historinë, duam ta kalojmë sfidën e parë të madhe,” ka përfunduar Berisha fjalimin e tij në konferecën e sotme për shtyp të bardhekaltërve.