Dardani zyrtarizohet te ekipi polak

Ish-basketbollisti i Sigal Prishtinës dhe Pejës, Dardan Berisha, është zyrtarizuar si lojtar i ri i ekipit polak, Polfarmex Kutno.

Më në fund, faqja zyrtare e këtij ekipi ka bërë të ditur se ka shtuar në radhët e veta basketbollistin e lindur në Pejë, që ka edhe pasaportë polake.

Berisha muajin e kaluar deklaroi se do të largohet nga basketbolli kosovar pasi që fitoi gjithçka aty dhe kishte ardhur koha për një tjetër provë në karrierë.

“Polfarmex Kutno ka shuter të ri në ekip” - ka shkruar njoftimi i botuar te mediat polake, transmeton Borozani.com.

Ndërsa trajneri i ekipit Yaroslav Krysiewicz ka thënë se me Dardanin, ekipi do të fitojë mjaft.

“Shpresojmë që Dardani të adaptohet shpejt në stilin tonë të lojës. Aftësitë e tija, karakteri i fuqishëm dhe përvoja, do të na ndihmojnë që të arrijmë qëllimet tona. Ai është shtesë e fuqishme në ekipin tonë,” ka thënë Krysiewicz për Probasketin polak.

Dardan Berisha vetëm në stinorin e kaluar me Sigal Prishtinën ka fituar titullin e kampionit në Kosovë, Kupën e Kosovës dhe titullin e ligës ballkanike.

Aktualisht, ai është duke treguar performancë të lartë edhe në përgatitje me reprezentacionin e Kosovës në Itali, ku Kosova po përgatitet për kualifikimet e para për Eurobasket 2017.