Dixon krahason Kosovën me Malin e Zi

Basketbollisti amerikan, Spencer Dixon, i cili gjatë pjesës vjeshtore të stinorit të sivjetëm kishte veshur fanellën e ekipit prizrenas, Bashkimi, është duke e vazhduar karrierën e tij te skuadra nga Rozhaja e Malit të Zi, Ibar, që e përfundoi pjesën e rregullt të kampionatit malazias në pozitën e katërt.

Në një intervistë për faqen eurobasket.com, Dixon ndër tjerash bëri edhe krahasimin ndërmjet kampionatit kosovar dhe atij malazias ku po luan tani.

“Këtu në Mal të Zi çdo lojë është një sfidë në vete. Në çdo ndeshje ke gjasa të fitosh ose të humbësh. Në Kosovë 3-4 ekipe janë shumë të forta dhe fitojnë rregullisht. Gara më sfiduese është këtu në Mal të Zi”.

Ish organizatori i portokallezinjëve gjithashtu foli edhe për trajnerin Miodrag Baletic, me të cilin ka punuar te skuadra prizrenase.

“Jam shumë falenderues për përvojën time te Bashkimi. Gjëja kryesore që kam mësuar nga Baletic është që të jem gjithmonë i përgatitur sepse gjërat mund të ndryshojnë në çdo moment,” tha 25 vjeçari.

Dixon në 13 paraqitje të zhvilluara për Bashkimin kishte realizuar mesatarisht 14.4 pikë, 3.4 kërcime dhe 5.4 asistime për ndeshje, derisa te skuadra e Ibarit po luan me mesatare prej 8.1 pikëve, 2.7 kërcimeve dhe 2.1 asistime në 7 ndeshje të zhvilluara deri më tani.