Duhet të kemi kujdes

Njëri ndër basketbollistët më të dalluar të Pejës, Drilon Hajrizi, është shprehur që ekipi i tij duhet të jetë tepër i kujdesshëm në përballje me rivalin e sontëm, Levski 2014. 

Përkundër motivimit të madh që e ka Peja aktualisht, pas fitores ndaj Sigal Prishtinës në Superligë, Hajrizi konsideron se Levski është rival i rrezikshëm. 

“Levski ka skuadër shumë të mirë. Pa marrë parasysh që luajmë si vendas ne duhet të kemi kujdes të madh. Nëse angazhohemi si në ndeshjet e kaluara dhe me ndihmën e tifozëve tanë, mendoj se do t’ia dalim që në fund të takimit të nxjerrim rezultat pozitiv.  Jemi shumë të motivuar. Do të mundohemi ta japim maksimumin dhe natyrisht nëse angazhohemi nga minuta e parë e deri tek ajo e fundit, atëherë fitorja do të vije vetvetiu,” ka thënë Hajrizi për faqen zyrtare të FBK-së. 

TABELA AKTUALE E BIBL

Peja ka bilanc 1-1 në Grupin B të Balkan League, derisa Levski është i pamposhtur me bilanc 2-0. 

Peja ka arritur gjysmëfinalet e BIBL në stinorin e kaluar.