BOREA - BASHKIMI
E dyta me radhë për kampionin
27 October, 2018 @18:49
Bashkimi ka shënuar edhe fitoren e dytë me radhë (për herë të parë këtë stinor) në Superligë, duke e mposhtur sonte Borean në Pejë, 91-98.
Pas pjesës së parë që kaloi thuajse krejtësisht barabartë, në çerek të tretë ekipi prizrenas krijoi një avantazh dhjetë pikësh (Borea 18-28 Bashkimi), për të hyrë në çerekun e fundit pak më sigurt që në fund përfundoi (Borea 27-23 Bashkimi) për përfundimtaren 91-98 në të mirë të Bashkimit.
Jordan Capps ka qenë më efikasi te Bashkimi sonte. Ai përfundoi ndeshjen me 25 pikë, 9 kërcime e 3 asistime. Alex Gorski ka pasur natë të mirë me treshe, duke shutuar 6/10 për të kryer ndeshjen me 23 pikë e 6 asistime.
Nga vendorët e kampionit, më efikasi ka qenë Gazzali Makasqi me 12 pikë e 7 asistime, ndërsa 10 të tjera shtoi Ergin Grosha.
Te Borea amerikani Patrick Wrencher që nuk pushoi asnjë minutë, kreu ndeshjen me 27 pikë, 14 kërcime e 4 asistime, ndërsa kapiteni Shpend Gashi shënoi 22 e Beqë Kovaçi 22 të tjera.
Në xhiron që vjen, që shënon edhe duelet e fundit për ciklin e parë të ndeshjeve në Superligë, Bashkimi pret Trepçën, ndërsa Borea i shkon Yllit.
