E nisëm keq dhe nuk u përmirësuam

Trajneri kroat i Pejës, Boris Kurtovic, mendon se fillimi jo i mirë i ndeshjes për Pejën, ia lehtësoi punën Prishtinën në ndeshjen e parë finale mbrëmë. 

Për më tepër, Peja nuk arriti të përmirësohet në vazhdim dhe për këtë edhe verdhezinjtë pësuan. 

Sidoqoftë, ai beson se me një punë rreth eliminimit të gabimeve të ndeshjes së parë brenda javës, do ta mposhtin Prishtinën në ndeshjen e dytë. 

“E nisëm keq ndeshjen dhe më pas nuk ia dolëm të rikuperojmë. Mirëpo ne nuk jemi të zhgënjyer, sepse ka ende shumë për t’u luajtur. Nuk ishim në nivelin e duhur në mbrojtje, ndërsa në sulm nuk patëm durim të mjaftueshëm. Po ashtu nuk patëm zgjidhje për lojën e mirë të lojtarëve të tyre shtatlartë. Megjithatë që nga dita e hënë ne do të fillojmë të punojmë në eliminimin e gabimeve që i bëmë në këtë ndeshje dhe të jemi të gatshëm për takimin e dytë në Pejë,” ka thënë kroati pas ndeshjes së humbur.

Peja do të kërkojë tani që të shfrytëzojë terrenin vendas në ndeshjen e dytë dhe të barazojë serinë përballë Sigal Prishtinës në finale në 1-1.