Ethet e superderbit në Pejë

Superderbi i basketbollit luhet sonte në Karagaç të Pejës. Derisa palestra pritet të jetë e stërmbushur nga çmimi simbolik prej 2 eurove për një ndeshje që vlen më shumë, të dyja ekipet kërkojnë fitore, veçanërisht vendasit. 

Dallimet

Dy stinorë më parë, Peja fitonte Sigal Prishtinën në finale të kampionatit, e stinorin që shkoi, Sigal Prishtina ia kthente pejanëve duke fituar çdo titull. 

Ndërkaq, ky stinor nisi përsëri me dominim të ekipit nga kryeqyteti. Ata fituan ndeshjen e parë të zhvilluar ndaj Pejës në Pallatin e Rinisë dhe të Sportve dhe janë të pamposhtur në vend ende. 

Peja të vetmen humbje e ka nga Sigal Prishtina në vend - dhe sonte kërkon kthimin në lojë dhe fitoren për t’u barazuar në tabelë. 

Basketbollistët e ndërruar

Ndërrimi i vetëm te kampioni nga ndeshja e parë e zhvilluar më 12 tetor është qendra amerikane. Atëherë luante Aaron McGhee, ndërsa për sonte, ata kanë angazhuar Gary McGhee. 

Peja, ndeshjen e parë e ka luajtur me vetëm dy të huaj (pasi që Jan Mocnik dhe Radomir Marojevic, nuk kishin të drejtë loje). E për më tepër, nga ajo kohë, Peja ka larguar Marojevicin duke angazhaur Jozo Brkicin, që pritet të debutojë në superderbi. 

Mocnik vs Berisha

Te vendasit Jan Mocnik është në formë tejet të mirë në xhirot e fundit, derisa te Sigal Prishtina i padiskutueshëm është Dardan Berisha që ka shënuar rekordin e pikëve për këtë stinor në Superligë, 49 dhe po mban më shumë se gjysmën e barrës së ekipit të tij.  

Transmetim i drejtpërdrejtë i lojës është paralajmëruar në RTV 21 HD, derisa pas ndeshjes ritransmetimi bëhet në RTV Dukagjini. Gjyqtarët që do ta ndajnë drejtësinë në superderbi dhe pritet të kenë punë sonte janë: Faton Kurshumlija, Xhelal Mumini dhe Artan Gashi. 

Këtu shikoni statistikat dhe artikullin e ndeshjes së parë Sigal Prishtina - Peja

Këtu shikoni tabelën aktuale të Superligës