ISTOGU - FERONIKELI
Feronikeli në finale, një hap para Superligës
6 April, 2019 @16:10
Skuadra e Feronikelit ka shënuar fitore edhe në ndeshjen e dytë të gjysmëfinales së PlayOffit të Ligës së Parë dhe duke e mposhtur Istogun sot si mysafir 53-71, ka arritur finalen e PlayOffit.
Kjo fitore bën që Feronikeli debutues në basketbollin kosovar, që në stinorin e dytë të tij të ëndërrojë Superligën, ndërsa në përballjen e sotme përkundër lojës së mirë të Istogut, çereku i fundit ka qenë i jashtëzakonshëm nga mysafirët e drejtuar prej Petrit Zeqirit [6-20 çereku IV].
Arti Hajdari ka shkëlqyer në duelin e sotëm për Feronikelin. Ai ka kryer ndeshjen me 23 pikë [5/11 për tre pikë] duke regjistruar edhe 4 kërcime e 3 asitime.
Përveç tij, Desmond Gattis me 16 dhe Beqë Kovaçi me 11 të tjera kanë qenë ndër më të dalluarit e skuadrës fituese.
Dyshja më e dalluar e Istogut Ardit Pepaj (24 pikë, 6 asistime) dhe Diamant Shabani (12 pikë, 13 kërcime) thjesht nuk patën ndihmën e bankës për të bërë më shumë në ekipin që drejtohet nga Fikret Shatri.
Kështu, Feronikeli tash në finale të PlayOffit do të pret fituesin e gjysmëfinales tjetër Vëllaznimi - DonBosko, që aktualisht është 1-0 në të mirë të gjakovarëve.
