Gjithçka lehtë për kampionin

Puna ekipore e Golden State Warriors bën që gjithçka të duket lehtë në ndeshje. Ndërsa fitoret po renditen. 

Viktimë e radhës ishte Chicago Bulls në United Center, ku në çdo çerek Warriors kanë qenë më të mirë se Bullsat, për të fituar me 31 pikë epërsi në fund. 

Sidoqoftë Stephen Curry ka thënë pas ndeshjes se ekipi është këndellur shpejtë pas avancimit të demave. 

“Ekipet e mira kthehen shpejtë dhe ne e arritëm këtë. Kjo flet për aftësitë e ekipit për përmirësim të shpejtë në lojë,” ka thënë MVP i stinorit të kaluar që përfundoi ndeshjen me 25 pikë, 11 asistime e 7 kërcime - për të qenë më afër se kurrë triple-double’it. 

Klay Thompson shënoi 20 e Harrison Barnes dha edhe 19 pikë të tjera për të kaluar lehtë Chicagon, pasi që një natë më parë kishin turpëruar LeBron Jamesin me Clevelandin. 

“Turp. Ndërpremë komunikimin derisa kishim në dorë lojën. Shumë lehtë u vërejt mungesa e komunikimit në anët e kundërta të fushës. E tëra çka mund të bëjmë është të mësojmë,” ka thënë Derrick Rose pas ndeshjes i cili e përfundoi atë me 29 pikë. 

Pas kësaj ndeshjeje Golden State Warriors ka bilanc 39-4 ndërsa Chicago Bulls ka regjistruar disfatën e pestë në 7 ndeshjet e fundit duke pasur bilanc 24-17 tash.