Graniti bëhet i Pejës!

Dy skuadrat më të forta të Kosovës, Peja dhe Sigal Prishtina, vazhdojnë t’i shkëmbejnë basketbollistët në mes vete.

Pas kalimit të Alban Veselit dhe të Blerim Mazrekut në Sigal Prishtinë, tani ka filluar të ndërohet kahja e transferimit të lojtarëve ndërmjet dy klubeve.

Pejanët kanë arritur marrëveshje me Granit Rugovën, i cili është duke e pritur fletëlëshimin nga klubi bardhekaltër për ta zyrtarizuar transferimin e tij.

Lajmi është bërë i ditur nga vetë klubi pejan dhe Graniti pritet që të jetë përforcimi i tretë për verdhezinjtë pas Drilon Hajrizit dhe Endrit Hysenagollit.

Përveç Granit Rugovës, pejanët janë duke e kërkuar me ngulm edhe vëllaun e tij, Fisnikun, mirëpo prishtinasit duket se nuk e kanë ndërmend ta lëshojnë këtë të fundit pasi që më parë kishin deklaruar se ai do të mbetet së paku edhe sivjet në Sigal Prishtinë.