Hajrizi: Kemi ekip për sukses

Drilon Hajrizi që gjatë javës së kaluar u angazhua mjaft dhe në fund triumfoi me ekipin e tij në Kupë të Kosovës, është shprehur se Kosova ka gjasa në parakualifikime, pas stërvitjes së parë me reprezentacionin.

Basketbollisti mitrovicas që këtë stinor po mbron ngjyrat e Pejës ka thënë se stërvitjet e para me selektorin e ri kanë kaluar mjaft mirë.

“Hymë në këtë stërvitje pas angazhimeve me skuadrat gjatë Final 8. Besoj se do të angazhohemi maksimalisht. Kemi një ekip të mirë për të pasur sukses. Me punën që do të bëjmë shpresoj shumë se do të tregojmë lojëra të mira,” ka thënë Hajrizi për FBK-në.

Kosova bën pjesë në Grupin B parakualifikues të zonës evropiane për Botërorin 2023 të basketbollit. Në grup si kundërshtarë ka Islandën, Sllovakinë dhe Luksemburgun. Kosova do të duhet të përfundojë në njërën prej dy vendeve të para që të sigurojë fazën e ardhshme të kualifikimeve.

Më 20 shkurt Kosova pret Islandën në Prishtinë, ndërsa më 23 luan ndaj Luksemburgut si mysafir.