Humbja e vetme e të kualifikuarit - nga Kosova

Me fillim nga ora 19:00, sonte Kosova përballet me Sllovakinë në kuadër të parakualifikimeve drejt Kampionatit Botëror të vitit 2023.

Në këtë grup, bashkë me Kosovën e Sllovakinë, janë edhe Luksemburgu e Islanda, ndërkohë që kualifikimin deri më tash e ka siguruar vetëm Islanda, e cila ka 9 pikë. Tri përfaqesueset e tjera të grupit kanë nga 7 pikë momentalisht.

Përfaqësuesja e vetme e kualifikuar, Islanda, në fazën grupore e ka pësuar vetëm një humbje, pikërisht në takimin ndaj Kosovës, e sot Kosova shpreson për një “favor” nga Islanda.

Që Kosova të ketë gjasa për kualifikim, në ndeshjen e orës 16:00 duhet që Islanda ta mposhtë Luksemburgun, e nëse ndodhë kjo, Kosova me fitore ndaj Sllovakisë e kalon grupin, për të kaluar kështu në fazën kualifikuese drejt Kampionatit Botëror.