I pafrikshmi Bernard Challandes

Me plot përvojë në supe, Bernard Challandes, ka qenë më i vendosur se zakonisht sot në përballjen me media në konferencë para ndeshjes ndaj Gjeorgjisë.

Zvicerani 70-vjeçar ka thënë se është i kënaqur me ekipin dhe nuk frikësohet nga shkarkimi. Ai ka bërë të ditur se trajnerët mbijetojnë çdo ditë me rezultate që i marrin. Ashtu sikurse ndodhi pas lojës me Gjeorgjinë në Batumi.

“Jam i kënaqur me këtë ekip dhe kurrë nuk frikësohem nga shkarkimi. Nëse Federata e sheh të arsyeshme atëherë në rregull, por nëse e sheh të arsyeshme vazhdimin, nuk ka problem, këtu jam,” — ka thënë Challandes sot në Prishtinë.

TABELA AKTUALE dhe ORARI I NDESHJEVE

Ai ka shtuar se ekipi i Kosovës nuk mund të pret gjithmonë fitore ndaj Suedisë, Çekisë apo Sllovenisë. Por ka thënë se nëse tash i humb ndeshjet e radhës, ndoshta nuk mund të mbijetojë. Mirëpo ai ka cekur një gjë, për të cilën është më i vetëdijshëm se shumë të tjerë që flasin.

“Nuk është me rëndësi e ardhmja e trajnerit por e Kosovës. Kosova ka të ardhme, por, ju lutem tregohuni me pak durim,” — ka thënë zvicerani.

Sa i përket problemeve në skuadër, Challandes ka thënë se nuk ka kurrëfarë problemi as me ekipin as me rezultatet. Ai ka bërë të ditur se është normale të humbet nga Suedia, nga e cila ka humbur edhe Spanja.

“Asnjë problem nuk po shoh. Kemi pasur paraqitje të mira me Gjeorgjinë, Greqinë dhe me Spanjën, prandaj nuk po shoh problem këtu. Për çka problem? Nuk kam asnjë problem. Ne po e bëjmë më të mirën, e kjo ndoshta nuk po mjafton. Spanja ka humbur nga Suedia. Unë marr përgjegjësi për të gjitha vendimet e mia. Por, nëse kemi pasur probleme tjera, po kemi pasur. Me COVID-19 dhe me lëndime kemi pasur dhe ato kanë lënë pasoja,” — bëri të ditur ai.

TABELA AKTUALE dhe ORARI I NDESHJEVE

Sa i përket ndeshjes së radhës Challandes, që ka arritur rekord pikë me Kosovën në një cikël kualifikues për Botëror ka thënë se synimi është paraqitja më e mirë e mundshme si dhe përgatitja për edicionin e radhës të Ligës së Kombeve.

“Duhet të pranoj se nuk isha i kënaqur me paraqitjen ndaj Suedisë. Vërejta mungesë të dëshirës, por pas bisedave dhe analizave pres dukshëm paraqitje më të mirë ndaj Gjeorgjisë,” — shton ai.

E sa për synime, ka treguar qartë.

“Synim është përgatitja më e mirë e Kosovës për ndeshjet e edicionit të radhës të Ligës së Kombeve që nisin në vitin e ardhshëm,” — ka thënë ndër të tjera Challandes.

Kosova po merr pjesë për herë të dytë në ciklin kualifikues për Botëror. Kësaj radhe Kosova ka arritur rekord pikë, dhe mund t’i shtojë ato në dy ndeshjet e mbetura krahasuar me edicionin debutues kualifikues.

TABELA AKTUALE dhe ORARI I NDESHJEVE

Pas gjashtë xhirove të zhvilluara në Grupin B ku favorite absolute të grupit llogariten Spanja e Suedia, Kosova është në vendin e katër, pas Greqisë dhe ka një fitore të vetme ndaj Gjeorgjisë që ia mundëson pozitën e parafundit në renditje.

Të martën, 12 tetor, Kosova pret Gjeorgjinë në Prishtinë dhe me një fitore të radhës, ose së paku barazim synon të betonojë pozitën aktuale, ndërsa varësisht nga rezultatet tjera të Greqisë, do të kërkojë edhe vendin e tretë të grupit në nëntor, kur është mysafire e helenëve në Athinë.