Istogu gati për të debutuar në palestrën e re

Skuadra që garon në Ligë të Parë të basketbollit të Kosovës, KB Istogu, pas shumë e shumë vitesh pritjeje do të luajë një ndeshje si vendas në palestrën e qytetit të Istogut!

Më në fund, KB Istogu do të mund të luajë një përballje ndaj një ekipi në tokë e shtëpi të saj, ndërsa Palestra e re “Istogu” të premten më 29 tetor do t’i bëj nikoqirllëk Prishtinës së re në përballjen e xhiros së tretë kampionale.

Vetë KB Istogu në njoftimin e lëshuar ka bërë të ditur se mirëpret adhuruesit e basketbollit për të qenë të pranishëm në sallë.

“Hera e parë që KB Istogu do të luajë një lojë zyrtare në tokën dhe shtëpinë e saj. Më 29 tetor 2021 me fillim prej orës 19:00 KB Istogu luan ndaj KB Prishtina e re. Ju mirëpresim në ambient të mrekullueshëm,” ka bërë të ditur njoftimi.

Istogu deri tash s’ka pësuar humbje këtë stinor dhe bilansi aktual i ekipit është 2-0. Ata dëshirojnë të vazhdojnë këtë seri, ndërsa në formë të njëjtë është edhe Prishtina e re, që ka dy fitore nga dy ndeshjet e para sezonale.

Njëra, të premten do të njoftohet me humbjen e parë sezonale ndërsa tjetra skuadër do të vazhdojë pamposhtshmërinë duke bërë bilansin 3-0.