Kampionja përfundon stinorin si lider

Sigal Prishtina ka përfunduar ashtu edhe siç pritej, si lidere pjesën e rregullt të stinorit në Superligë. 

Bardhekaltërit sonte përmbyllën stinorin e rregullt me fitore ndaj Trepçës, në ndeshjen e mbetur nga xhiroja e XXVI e Superligës, që ishte shtyer. 

Prishtina edhe njëherë u tregua shumë më e fortë se Trepça, për ta mposhtur ekipin mitrovicas për herë të katërt këtë stinor, me afro 40 pikë epërsi. 

Blerim Mazreku ka qenë lojtar i ndeshjes sonte në fitoren e bardhekaltërve. Mazreku shënoi 18 pikë, derisa realizoi edhe 14 kërcime e 5 asistime në ndeshje për të arritur shifrën e efiçencës prej 30. 

Ai u ndihmua edhe nga organizatori amerikan, Jordan Hulls, që për 20 minuta sa qëndroi në parket shënoi 20 pikë për ekipin finalist të BIBL. 

Përveç dyshes së përmendur, vetëm edhe Dardan Berisha ka shënuar pikë dyshifrore sonte te Prishtina, 18.

Te Trepça, drita e vetme sonte ishte Samir Zekiqi, që me 23 pikë e 3 kërcime ishte dukshëm më i mirë se bashkëlojtarët e tij në disfatën, me të cilën mitrovicasit përmbyllin stinorin e dytë pa Play-Off brenda 3 stinorëve të fundit. 

Kështu, Prishtina me 26 fitore e 2 humbje (nga Peja), përmbyll stinorin në vend të parë, që ia mundëson epërsinë e terrenit vendas gjatë Play-Offit, ndërsa Trepça përfundon e pesta me bilanc negativ, prej 12 fitoreve e 16 disfatave. 

REZULTATET DHE TABELA PËRFUNDIMTARE E SUPERLIGËS

Statistikat ekipore

Statistikat individuale te Trepça

Statistikat individuale te Sigal Prishtina