Kastrioti në finale të Play-Out

Kastrioti që vetëm në dy xhirot e fundit të Superligës nxorri biletën për shpëtim nga vendi që dërgon në Play-Out, është shumë afër të sigurojë mbijetesën në elitën e basketbollit të Kosovës. 

Ferizajasit, kanë arritur që të shënojnë fitore ndaj Kosovës së Vushtrrisë në ndeshjen e dytë gjysmëfinale të Play-Outit për të arritur finalen, ku i pret fituesi i përballjes, Ylli-Newborn. 

Kastrioti kishte fituar ndeshjen e parë gjysmëfinale me rezultat zyrtar, pasi që vushtrriasit nuk kishin udhëtuar në Ferizaj për shkak të mungesës së lojtarëve. 

E në ndeshjen e dytë kur Kosova u desht të fitoj me mbi 20 pikë epërsi, ata jo vetëm që nuk arritën të fitojnë, por u mposhtën me +18 pikë tjera. 

Tashmë, Kastrioti që me fitoren e madhe ndaj Besës së Pejës në Superligë rrëzoi RTV 21-shin nga Superliga, është shumë afër të mbijetojë, përkundër se e pret edhe një dyluftim me fituesin e ndeshjes Ylli-Newborn. 

Ky është stinori i dytë ku Play-Outi luhet në këtë sistem, ku takohen i parafundit nga Superliga me të katërtin e Ligës së Parë dhe ‘dyshi’ e ‘treshi’ i Ligës së Parë. Fituesit e këtyre përballjeve, takohen në finale që siguron një vend në elitë për stinorin e radhës. 

Më parë, për Play-Out është zhvilluar vetëm ndeshja finale ndërmjet parafundit të Superligës dhe vendit të dytë të Ligës së Parë.