Kosova U20 mposhtet me 49 pikë dallim në duelin e parë

Përfaqësuesja e Kosovës U20 është mposhtur me 49 pikë dallim nga bashkëmoshatarët estonezë, në ndeshjen e parë të ditës së parë të Kampionatit Evropian U20 të Divizionit B, që po mbahet në Portugali.

Ekipi i drejtuar nga selektori Ibrahim Karabeg dhe ndihmësit Lorik Kllokoqi e Egzon Uka, për 30 minuta lojë kanë shënuar 21 pikë, e kur estonezët bënin eksperimente me lojë në çerekun e fundit, tanët shënuan në dhjetëminutëshin e fundit 16 të tjera për përfundmitaren 86-37 [24-10, 23-3, 17-8 dhe 22-16] në të mirë të shtetit baltik.

I vetmi lojtar që shënoi pikë dyshifrore për Kosovën në këtë ndeshje ka qenë Leon Neziri. Ai e kreu ndeshjen me 12 pikë, gati sa 1/3 e ekipit. Nëntë pikë i shënoi Meriton Ismaili, ndërsa 7 Yll Gashi.

Prej 12 lojtarëve të futur në lojë nga selektori, me secilin që luajti minimum 8 minuta, vetëm 6 lojtarë kanë arritur të shënojnë pikë për Kosovën në ndeshje.

Dueli i radhës për Kosovën U20 është nesër. Kosova U20 ndaj Holandës U20 me fillim në ora 17:00.