Kosovarët, liderë statistikor në BIBL

Basketbollisti i Sigal Prishtinës, Dardan Berisha, bashkë me dyshen e Pejës, Samir Shaptahovic dhe Frederick House janë tre nga pesë liderët statistikorë të ligës ballkanike, vetëm dy xhiro pa përfunduar stinori i rregullt i kësaj gare. 

Berisha është duke udhëhequr listën e koshashënuesve me mesatare prej 18.5 pikë për ndeshje, derisa edhe këtu përcillet nga Samir Shaptahovic me mesatare prej 17.8 pikësh. 

Vetë Samiri është duke udhëhequr listën e asistuesve në Balkan League. Playmakeri pejan ka 5.6 asistime për ndeshje dhe është njëri ndër individët më të mirë në pozitën e tij në këtë ligë. 

E veterani amerikan që luan për Pejën, Fred House është vjedhësi më i mirë i topave në BIBL. House me përvojën e tij ka arritur që të jetë larg të tjerëve në këtë listë me mesatare prej 2.6 topa të vjedhur për ndeshje, derisa pas tij vjen përsëri Shaptahovic me 1.9 topa të vjedhur për ndeshje. 

Sa i përket kërcimeve aty lider është Noah Dahlman i Balkan Botevgradit, derisa te bllokadat është James Tyler i Craiovës. 

Sigal Prishtina do të luaj pasnesër me Craiovan, derisa Peja ka telashe vizash për udhëtimin e nesërm në Izrael ndaj Galil Gilboas dhe pritet që të humb ndeshjen me rezultat zyrtar.