Kthehet Jones

Amerikani Kendrick Jones, që i mungoi Sigal Prishtinës në dy ndeshje derbi me Pejën në kuadër të Balkan League dhe Superligës së Kosovës pritet të kthehet në fushë të lojës në ndeshjen e nesërme ndaj Craiovës. 

“Po, Jones do të jetë i gatshëm dhe në dispozicion të trajnerit Ceyhun Cabadak për këtë ndeshje dhe nuk kemi asnjë lojtar tjetër që aktualisht përballet me lëndime,” ka konfirmuar menaxheri i marrëdhënieve me publikun pranë skuadrës së Sigal Prishtinës, Ramadan Gagica për Borozani.com. 

Jones i është kthyer të hënën stërvitjeve me klubin e tij, pas lëndimit që e pësoi në gisht. Sigal Prishtina kishte mposhtur Pejën në kuadër të Balkan League pa Jonesin, por humbi në Karagaç në kuadër të Superligës. 

Kendrick Jones, i cili në fillim të stinorit erdhi në Sigal Prishtinë, pasi ishte liruar nga RTV 21 ku shkëlqeu stinorin e kaluar, është shpallur edhe basketbollisti më i mirë i xhiros së parë të Balkan League. Amerikani 30 vjeçar është treguar shumë i rëndësishëm për ekipin e tij këtë stinor.  

Sigal Prishtina kërkon fitoren e pestë në kuadër të Balkan League nesër në ndeshje me Craiovën. Ndeshja luhet në Pallatin e Rinisë dhe të Sporteve me fillim nga ora 17:30.