Kujt do t’i takojë trofeu i parë i vitit?!

Dy skuadrat padyshim më të mira në tre vitet e fundit të basketbollit kosovar, Sigal Prishtina dhe Peja, dominuan në dy stinorët e fundit, ndaj të tjerëve - dhe këtë po e tregojnë edhe këtë stinor. 

Prishtina dhe Peja do të përballen sonte në finalen e madhe të Final Fourit të Kupës, që do t’ia sjellë njërës trofeun e parë për këtë vit dhe në stinorin e ri. 

Derisa Prishtina ka fituar gjithçka të mundshme në stinorin që shkoi, Peja është në kërkim të Kupës së parë që nga viti 2011, kur patën fituar pikërisht Prishtinën në finale. 

Sigal Prishtina e drejtuar nga Marjan Ilievski, mposhti Trepçën në gjysmëfinale të Final Fourit, lehtë dhe shpejtë dhe bardhekaltërit në mungesë të lojtarit më të mirë të tyre, Dardan Berisha, kërkojnë mbrojtjen e trofeut të Kupës. 

Në anën tjetër, Peja mposhti Yllin vendas dhe organizator të Final Fourit në gjysmëfinale, ku lojë të mirë veçanërisht tregoi përforcimi i ri Nic Wise, derisa u dalluan shumë edhe vendorët me performancën e tyre. 

Fitorja për Pejën do të thoshte shumë, pasi që ata tashmë kanë siguruar edhe Play-Offin (gjysmëfinalen) e ligës ballkanike. 

Gjithçka do të vendoset sonte, nga ora 20:15 në 13 qershori të Suharekës, ku tifozët e të dyja palëve kanë premtuar spektakël, derisa Federata e Basketbollit të Kosovës, ka kërkuar që gjithçka të shkojë në frymë sportive dhe të fitojë më i miri në fund.