Peja shuan ëndrrat e Yllit

Peja ka arritur të dalë në finale të Kupës së Kosovës duke e mposhtur Yllin organizator të Final Four 2015. 

Wise fantastik

Te ekipi pejan sonte është dalluar Nic Wise që ka qenë i jashtëzakonshëm, derisa te mysafirët nuk ndezi asgjë pas çerekut të parë të lojës. 

Peja i kthehet finales së Kupës pas një viti mungesë, derisa aty e pret rivali i ashpër Sigal Prishtina. 

Forca e Yllit

Fillimi i ndeshjes i takoi bindshëm Yllit. Vendasit, të përkrahur edhe nga publiku që kishte stërmbushur palestrën 13 qershori kanë krijuar epërsi 7 pikëshe në fund të 10 minutëshit të parë. Gjatë këtyre minutave, Najee White dhe Charles Hammork udhëhoqën Yllin drejt avantazhit. 

Furia e Pejës

Mirëpo, në çerekun e dytë Peja, më saktësisht, Nic Wise, tregoi cilësitë e tij të jashtëzakonshme. Ai shënoi hiç më pak se 16 pikë për të rikthyer rezultatin në të mirë të verdhezinjëve, derisa në fund të pjesës së parë pejanët krijuan epërsi të konsiderueshme prej 45-33. 

Kur pritej rikthimi i Yllit në lojë në nismë të pjesës së dytë të ndeshjes, nxënësit e Agron Berishës nuk e arritën këtë. Peja vazhdoi të mbajë ritmin, derisa Ylli asnjëherë nuk u ndez siç ka bërë në disa ndeshje gjatë Superligës. 

Ruajtja e epërsisë

Peja arriti të mbajë epërsinë 15 pikëshe thuajse gjatë gjithë çerekut të tretë, derisa Ylli kërkonte këndelljen. 

Rrjedha e çerekut të fundit nuk solli ndryshime të mëdha në ndeshje edhe pse Ylli disa herë uli epërsinë pejane, por përfundimisht Peja ishte sonte shumë më e mirë se ekipi vendas dhe arriti finalen e Kupës për herë të parë që prej Final Four 2013. 

Nic Wise me 22 pikë ishte koshashënuesi më i mirë ndeshjes, derisa Alban Veseli u dallua me double-double prej 19 pikë e 16 kërcimeve. Por, Albani nuk ishte i vetmi me double-double te Peja. Atij këtu i bëri konkurrencë edhe Drilon Hajrizi që regjistroi 10 pikë e 11 kërcime, derisa te Ylli më efikas ka qenë White, me double-double prej 20 pikëve dhe 13 kërcimeve. 

Finalja

Pejë në finalen e së dielës takohet ndaj rivales së ashpër të saj, Sigal Prishtina, në ndeshjen që zhvillohet në palestrën 13 qershori të Suharekës, e cila u dallua sonte me organizim të mirë të ditës së parë të Final Four 2015. 

Statistikat ekipore:

Statistikat individuale te Ylli:

Statistikat individuale te Peja: