Kumanova del e para, me një ndeshje më shumë

Kumanova ka arritur të fitojë Kozuvin në derbin maqedonas të Balkan League sonte. Ekipi kumanovar ka pasur një paraqitje fenomenale në mbrojtje, pasi që në çerekun e parë mysafirëve nga jugu i vendit të tyre nuk u ka lënë të shënojnë më shumë se 5 pikë!

E me këtë ritëm ata kanë vazhduar edhe më tej, edhe pse Kozuvi tentonte të arrinte më shumë, por thjeshtë pas disfatës 14-5 në çerekun e parë ata më nuk arrinin t’i afroheshin Kumanovës. 

Me këtë fitore Kumanova ka marrë lidershipin e Balkan League në ndeshjet e fundit me një lojë më shumë të zhvilluar dhe do të përmbyll vitin si lider i BIBL, mbi Sigal Prishtinën, që është ekipi që i ka shkaktuar humbjen e parë Kumanovës në BIBL. 

Në ndeshjet tjera të kësaj xhiroje, Peja pret kampionin aktual të BIBL, Galil Gilboa nesër mbrëma në Pejë, derisa derbi bullgar luhet pasnesër ndërmjet Balkanit dhe Levskit.