Kupa U12 Kerasanit, U14 Pejës

Të shtunën dhe të dielën në palestrën e sportit “Jeton Tërstena-Tota” në Vushtrri është zhvilluar Final Four-i i Kupës së Kosovës U-12 dhe U-14. Të shtunën kanë qenë në program ndeshjet gjysmëfinale, kurse të dielën janë luajtur finalet në të dyja kategoritë.

Fituese e Kupës U-12 është shpallur skuadra e Kerasan Prishtinës, e cila e ka mposhtur Vushtrria Basketin në finale me rezultat 45:23, kurse te U-14 ka triumfuar Peja, që në finale e ka mundur Kerasan Prishtinën me shifrat 39:35.

MVP i U-12 është zgjedhur Genc Zeqiri, basketbollist i Kerasan Prishtinës, kurse te U-14 ky epitet i ka takuar Albin Berishës, anëtar i klubit të basketbollit Peja.

Pjesëmarrëse të Final Four-it të Kupës U-12 ishin këto ekipe: Kerasan Prishtina, M Junior Prishtina, Vushtrria Basket dhe Golden Eagle Ylli, kurse te U-14 ishin këto skuadra: Bashkimi, Kerasan Prishtina, Peja dhe M Junior Prishtina.