FERONIKELI - LIPJANI
Lipjani arrin edhe fitoren e dytë të stinorit
8 February, 2020 @18:41
Skuadra e Lipjanit, pas befasisë së stinorit të bërë ndaj Bashkimit, kur arriti fitoren e parë sezonale, sonte ka shënuar edhe fitoren e dytë.
Lipjani ka mposhtur Feronikelin si mysafir sonte, duke e fituar me rezultat 62-68, falë lojës së mirë të treguar në çerek të dytë dhe të tretë të takimit [23-12, 13-22, 13-20 dhe 13-14].
Më i dalluari te ekipi i drejtuar nga P Olluri ka qenë Tamas Bruce. Amerikani ka kryer lojën me double-double prej 23 pikëve dhe 14 kërcimeve, ndërsa është ndihmuar edhe nga bashkëkombasit e tij, Emmnauel Sullivan 15 pikë, 10 kërcime dhe Joshua Boutte 12 pikë e 12 kërcime - të tretë pra, double-double.
Në anën tjetër mundi i drenicakëve të udhëequr nga Fikret Shatri nuk mjaftoi. Dayon Griffin dha 25 pikë, Fis Juniku 11 e Trevor Nix 10 pikë e 11 kërcime - që ishin të pamjaftueshme për të bërë një hap të madh me fitore.
Pas këtij dueli Feronikeli ka bilans 5-17, ndërsa Lipjani 2-21.
