Liria përforcohet me dy lojtarë të Drenasit!

Mbrëmë Liria ka bërë të ditur se ka arritur marrëveshje me dy lojtarë të Drenasit, për të shtuar cilësinë në skuadër para se të nis pjesa pranverore e stinorit.

Sipas njoftimit të klubit, dyshja ka nënshkruar kontrata me klubin bardhezi nga Prizreni, që ka vënë synim rikthimin në Superligë. Liria tashmë po kalon stinorin e katërt në Ligë të Parë të Kosovës.

Mesfushori me përvojë Qemail Elshani dhe portieri Amrush Bujupi janë prezantuar si përforcime në klubin prizrenas, ndërsa Elshani 31-vjeçar pritet të shtojë cilësi në mesfushën e ekipit, derisa ka luajtur si kapiten te Drenasi deri tash.

Në anën tjetër Bujupi 26-vjeçar pritet që me 189-centimetrat e tij të bëj më të sigurtë portën e skuadrës.

Përndryshe, Liria ka kryer pjesën vjeshtore të stinorit në Ligën e Parë Grupi A nën drejtimin e Xhengis Rexhepit në pozitë të katërt me 24 pikë nga 14 ndeshje, 4 më pak sesa lideri Feronikeli’74.

Ekipi gjithashtu ka arritur të befasojë Dritën në Kupën e Kosovës, duke e mposhtur në të tetën e finales për të arritur në çerekfinale të Kupës së Kosovës ku do të ndeshet me Llapin.

Në stinorin e kaluar, Liria kishte arritur deri në barazhin e parë për Superligë, ku ishte mposhtur nga Vushtrria pas penalltive.