EDHE NJË HAP
Luftëtarët i bëjnë ballë Lebronit fenomenal
15 June, 2015 @9:06
Shënoi shtatë treshe dhe 37 pikë, por edhe një fitore i duhet Stephen Curryt, për të festuar përnjëmend stinorin e mrekullueshëm që po e kalon me ekipin.
Golden State Warriors i ka bërë ballë edhe një performance monstruoze të LeBron Jamesit, që me triple-double shkëlqeu në parket.
“Moment shumë i mirë, mirëpo domethënia e vërtetë do të fitohet kur ne fitojmë diçka. Vetëm kjo mbahet në mend, momenti që lojtarët ngrisin trofeun,” ka thënë Curry për nba.com pas ndeshjes, duke bërë të ditur se puna nuk ka përfunduar, përkundër se ekipi i tij udhëheq 3-2 serinë finale dhe kërkon edhe një fitore për të arrtiur trofeun.
Draymond Green dhe Andre Iguodala me 16, përkatësisht 14 pikë shtyen Luftëtarët drejt fitores gjithashtu.
“Jam i qetë, ngase unë jam lojtari më i mirë në botë,” ka thënë LeBron James, që përfundoi ndeshjen me 40 pikë të shënuara, 14 kërcime dhe 11 asistime.
Ndeshja e radhës luhet në Cleveland, ndërsa fitorja e Golden State-it do t’ia sjell titullin këtyre. Në rast të fitores së Clevelandit, seria bartet në Golden State ku vendoset përfundimisht kampioni i stinorit.
