Mihalic ia nis me Trepçën

Ish organizatori i Vëllaznimit të Gjakovës, slloveni Marcel Mihalic, pas marrëveshjes me Trepçën ka zhvilluar stërvitjen e parë në Mitrovicë. 

Slloveni 22 vjeçar që shkëlqeu te Vëllaznimi i Gjakovës, Marcel Mihalic, pas arritjes së marrëveshjes me kampionin aktual të Kosovës, Trepçën, dje ka zhvilluar stërvitjen e parë me klubin e tij të ri.

Mihalic i cili tre herë ishte në pesëshen më të mirë të javës së BKT Superligës gjatë stinorit vjeshtor me Vëllaznimin, është shprehur i kënaqur me pritjen që i kanë bërë në Mitrovicë. 

“Dje kam arritur këtu. Më pritën mirë, gjithçka duket mirë në fillim si tifozët, ashtu edhe ekipi. Kemi filluar stërvitjet dhe trajneri është shumë i mirë,” ka thënë slloveni në një prononcim të shkurtër dhe ekskluziv për portalin tonë. 

Pas largimit të trajnerit që ua mundësoi kurorën e dyfishtë stinorin e kaluar, Neven Plantak, Trepça ka angazhuar në vend të tij një trajner me përvojë finlandez, Mika Turunen. Turunen 47 vjeç është shpallur katër herë trajner i vitit në Finlandë. 

Trepça gjendet në pozitën e katërt të BKT Superligës dhe nuk ka arritur të fitojë asnjërën nga ekipet e të ashtuquajturës katërshja e madhe. 

Mitrovicasit ende nuk kanë përfunduar renovimin e palestrës Minatori dhe ndeshjet si vendas i luajnë në palestrën Jeton Tërstena - Tota, të Vushtrrisë.