Mposhtim Teodon, por edhe Pejën

Qendra e Sigal Prishtinës, Blerim Mazreku, me shumë motiviacion dhe bindshëm ka folur për ndeshjen e nesërme ndaj Teodos në Balkan League. 

Bile, ai ka shkuar edhe më tej duke parashikuar edhe fitore ndaj Pejës në ndeshjen e ardhshme të kësaj lige. 

“Mendoj se do të fitojmë kundër Teodos sepse jemi ekip më i fortë, por do të fitojmë edhe ndaj Pejës në ndeshjen e radhës,” ka thënë basketbollisti me origjinë nga Suhareka në konferencën e sotme për shtyp të klubit të tij. 

Sa i përket lojës së nesërme qendra 206 centimetërshe e Prishtinës mendon se ekipi i tij do të dominojë nën kosh dhe ky do të jetë çelës i fitores së ekipit të tij.

“Kemi analizuar ndeshjet e tyre me trajnerin. Kemi përparësi në pozitën 5, ku luan një lojtar si K’Zell Wesson, përkundër se edhe ata kanë një qendër të mirë. Por në përgjithësi, mendoj se ne do të dominojmë në trapez,” ka përfunduar Mazreku bindshëm sot. 

Blerim Mazreku është njëra ndër qendrat më me përvojë në Kosovë. Ai vjet ka qenë anëtar i Pejës me të cilin ekip u shpall kampion i Kosovës në basketboll, derisa gjatë verës u transferua në Sigal Prishtinë. 

Sigal Prishtina pas ndeshjes me Teodon do të ndeshet me Pejën në kuadër të Balkan League, pas një xhiroje pushim.