Muaji i Jones-it

Kendrick Jones është zgjedhur basketbollisti më i mirë i muajit prill në BKT Superligën e Kosovës. Basketbollisti i Teleboysave pas votimit unanim të gazetarëve sportiv, ka fituar çmimin ‘Basko’, bën të ditur Federata e Basketbollit të Kosovës.

Jones ishte lider i RTV 21-shit, skuadër kjo e cila me kontributin e madh të amerikanit, siguroi vendin e katërt në tabelë për t’u kualifikuar në playoff.

Për herë të fundit këtë çmim e kishte fituar plejmekeri i Sigkos Bashkimit, Kejuan Johnson, ndërsa më parë fitues kanë qenë edhe Adam Waleskowski i Sigal Prishtinës dhe Dardan Berisha i Pejës. Ky i fundit është fitues i dyfishtë i çmimit Basko.