Mund ta ndalim Levskin

Frederick House flet ekskluzivisht për Borozani.com para ndeshjes së vështirë me Levski Sofian. 

Ylli amerikan me përvojë i Pejës, Frederick House, beson se ekipi i tij do të mund të arrijë te fitorja e parë si mysafir përkundër kundërshtarit të vështirë nëse luhet në mënyrë ekipore sot. 

Sonte do të mundohemi të fitojmë si mysafir

Duke ditur rëndësinë e ndeshjes ndaj Levskit, House 35 vjeç ka thënë se ekipi pejan duhet të dalë të luaj në fushë sikur të ishte kjo ndeshja e fundit e tyre. 

“Pres që Peja, ekipi im, të dalë në fushë dhe të luaj sikur të ishte kjo ndeshja e fundit e stinorit për ne. Ata luajnë mençur dhe nuk humbasin topa shumë,” ka thënë fillimisht House duke bërë të ditur gjithashtu cilësitë e kundërshtarit. 

Peja, siç dihet të gjitha fitoret në kuadër të ligës ballkanike i ka arritur si vendase në Karagaç, derisa jashtë vendit ende nuk ka shijuar fitoren. 

“E vërtetë është se nuk kemi fituar jashtë, mirëpo për këtë gjë do të mundohemi sonte. Natyrisht që nuk do të jetë lehtë,” mendon amerikani që në karrierë ka djersitur fanella të ekipeve të ndryshme nga Euroleague. 

Nëse luajmë si ekip, mund të ndalim çdokë

Fred, që ka bërë për vete Pejën e shumë më gjërë me profesionalizmin e tij e din se Levski është në formë shumë të mirë gjatë këtij viti, por beson jashtëzakonisht në forcën ekipore. 

“Mund ta ndalim çdo rival nëse luajmë si ekip. Unë jam gjithmonë i gatshëm për sfida të tilla. Vetëm si ekip fitohen këto ndeshje,” ka qenë i qartë amerikani. 

Ku e sheh Fred House Pejën në fund të stinorit në Balkan League? 

“Nuk do të përgjigjem saktësisht në këtë pyetje, që të mos flas fjalë të madhe e të sjell ndonjë baksuzllëk. Dua që të dalë në fushë, luaj fortë dhe të fitojë çdo ndeshje sipas radhës,” ka përfunduar House i cili ka mesatare prej 15 pikë për ndeshje në BIBL, derisa është lider sa i përket vjedhjes së topave me 2.4 sosh për ndeshje në Ballkan.