Para titullit, Peja - Prishtina

Dy skuadrat që dominuan basketbollin kosovar në stinorët e fundit, Peja dhe Prishtina, nesër mbrëma do të vendosin se cila nga këto do të shpallet kampione e Kosovës në basketboll për stinorin 2015/16.

Duelet e deritashme 6-6!

Dymbëdhjetë duele nga fillimi i stinorit të zhvilluara mes këtyre dy ekipeve në të gjitha garat tregojnë mjaft. Gjashtë fitore i shkuan Pejës, gjashtë Prishtinës. Nesër mbrëma - njëra do të arrijë të shtatën dhe titullin kampion.

Fitoret e Pejës

Peja mposhti Prishtinën në finale të Superkupës, tre herë gjatë stinorit të rregullt dhe 2 herë në serinë finale të PlayOffit.

Fitoret e Prishtinës

Prishtina mposhti Pejën në finale të Kupës, një herë gjatë stinorit të rregullt, 2 herë në ligën ballkanike dhe 2 herë në finale të PlayOffit.

Fito dhe merre titullin

Duelet e këtij stinori kanë qenë ndër më interesantet nga vitet e mëparshme, pasi që shumica e tyre kanë përfunduar në mënyrë dramatike dhe me rezultat të ngushtë.

Nesër mbrëma pritet gjithashtu një ndeshje e tillë, derisa Peja luan para publikut të vetë për të kthyer këtë trofe në Pejë, kurse Prishtina do të kërkojë mbrojtjen e titullit.

SKEMA E PLAYOFFIT DHE RAPORTET E NDESHJEVE

Ajo që është e sigurt, është spektakli basketbollistik vendor ku takohen dy ekipet më të mira të Kosovës, ndërsa kush e fiton titullin - mbetet të shihet në më pak se 24 orë.