Peja e fortë për Teleboysat

Ndeshja kryesore e javës në BKT Superligë ndërmjet Pejës dhe RTV 21-shit, përfundoi në të mirë të pejanëve të cilët fituan me rezultat 82-75.

Çereku i parë i ndeshjes ishte nën dominimin e lehtë të skuadrës së Pejës, e cila ishte më e mirë për 2 pikë në fund të 10 minutëshit të parë. Në çerekun e dytë gjërat ndryshuan. Ekipi i RTV 21 arriti për herë të parë të del në epërsi kur rezultati u bë 39-40, derisa në fund të pjesës së parë skuadrat shkuan në zhveshtore me epërsinë dy pikëshe të Teleboysave, 43-45.

Çereku i tretë filloi me epërsinë 7-0 të Pejës, ku të gjitha pikët u shënuan nga Dardan Berisha. Dardani këtë çerek e përmbylli me 19 pikë duke qenë i pandalshëm për mbrojtjen mysafire. Ndërsa në çerekun e katërt pejanëve nuk i mbeti asgjë përveç se ta rruajë epërsinë nëpërmjet pikëve të Samir Shaptahoviçit dhe Berishës.

Përveç Berishës i cili ishte koshashënuesi më i mirë i ndeshjes, pikë dyshifrore te Peja shënuan edhe Samir Shaptahoviç me 19 pikë, Alban Veseli me 11 dhe Gerti Shima me 10 pikë.

Kurse te Teleboysat 22 pikët e Brandon Robersonit dhe 14 të Ersan Ozsevenit ishin të pamjaftueshme për fitoren e mysafirëve.

Pas kësaj jave, Peja tani ka 14 fitore dhe një humbje, aq sa ka edhe Sigal Prishtina, mirëpo tani ekipi prishtinas renditet në krye të radhitjes tabelare për shkak të koshdallimit më të mirë. Ndërsa RTV 21-shi ka bilanc prej 6 fitoreve dhe 9 humbjeve.

REZULTATET E JAVËS:

Peja	RTV 21	82 - 75
Sigal Prishtina	Kosova	112 - 44
Trepça	Drita	79 - 58
Sigkos Bashkimi	Vëllaznimi	97 - 67

TABELA (fitore-humbje)

1	Sigal Prishtina	14	1
2	Peja	14	1
3	Sigkos Bashkimi	10	5
4	Trepça	8	7
5	RTV 21	6	9
6	Vëllaznimi	4	11
7	Drita	3	12
8	Kosova	1	14

Koshashënuesit më të mirë të ndeshjes Peja - RTV 21

1	Dardan Berisha	33 pikë	Peja
2	Brandon Roberson	22 pikë	RTV 21
3	Samir Shaptahoviç	19 pikë	Peja
4	Ersan Ozseven	14 pikë	RTV 21
5	Kendrick Jones	12 pikë	RTV 21
6	Urim Zenelaj	12 pikë	RTV 21