Peja e mbyll me fitore fazën e dytë

Skuadra e Pejës ka shënuar fitore në ndeshjen e fundit të fazës së dytë në Ligën Ballkanike.

Verdhezinjtë e mposhtë në palestrën “Karagaçi” skuadrën malaziase, Teodo, me rezultat 75-70.

Rëndësia e kësaj ndeshjeje ishte vetëm sa për të mësuar kundërshtarët e çerekfinales, pasi që pas përjashtimit të Karpos Sokolit nga Liga Ballkanike, edhe Peja e edhe Teodo e kishin siguruar vendin e tyre në çerekfinale.

Pjesa e parë e ndeshjes kaloi me dominimin e plotë të Pejës, e cila në pushim shkoi me +22 pikë epërsi, 54-32.

Por, me të filluar çereku i tretë, gjërat ndryshuan në dobi të mysafirëve, të cilët filluan ta përmbysin disavantazhin që e kishin.

Medje Teodo e përmbysi aq shumë disavantazhin sa që ia rrezikoi edhe fitoren Pejës, që në pjesë të parë dukej se do të arrihej me lehtësi.

Vetëm 17 sekonda para fundit, Teodo u afrua në -3 pikë, kur me shënimin e ish lojtarit të Pejës, Radomir Marojevic rezultati u bë 73-70.

Megjithatë, befasinë e pengoi Noah Dahlman, që u tregua i saktë nga gjuajtjet e lira në aksionin e radhës, për t’ia siguruar fitoren Pejës me rezultat 75-70.

Peja në këtë ndeshje luajti pa ndihmën e Alban Veselit dhe malaziasit, Slobodan Miljanic, ndërsa në mungesë të tyre më i dalluari ishte Robert Abramovic që shënoi 18 pikë, kurse Noah Dahlman luajti me double-double prej 11 pikëve dhe 11 kërcimeve.

Në anën tjetër, ish lojtari i Pejës, Radomir Marojevic, ishte më i dalluari te Teodo me 24 pikë të shënuara.

TABELAT PËRFUNDIMTARE TË FAZËS SË DYTË

Pavarësisht kësaj fitoreje, pozita e Pejës në tabelë nuk ka ndryshuar, megjithëse tashmë i barazoi pikët me Teodon, pasi që në ndeshjen e parë malaziasit kishin shënuar fitore më të thellë.

Me këtë edhe përfundoi faza e dytë grupore, ndërsa tani skuadrat e kualifikuara tutje do të vazhdojnë rrugëtimin nga çerekfinalja, derisa gjysmëfinalen e kanë të garantuar liderët e grupit C dhe D, Beroe dhe Kumanovo.

Peja

Teodo