Peja heroikisht te fitorja ndaj Prishtinës

Peja e arriti atë që e donte shumë. Fitoren e madhe ndaj Sigal Prishtinës, për t’ia shkaktuar këtyre humbjen e parë të stinorit. 

Karagaçi me afro 3 mijë shikues gumëzhinte Peja-Peja, derisa në ndeshje kishte gjithçka nga basketbolli. 

Paraqitje e mrekullueshme e dy ekipeve, që janë shpirt i basketbollit të vendit tonë, derisa lojtarët luftuan deri në atomin e fundit të tyre, duke rrezikuar edhe lëndime në disa raste. 

Fillimi i furishëm dhe snajperët funksional

Superderbi ia nisi furishëm. Treshe nga secila palë, shpejtë. Në njërën anë Samir Shaptahovic dhe Hrvoje Puljko, në tjetrën Dardan Berisha dhe Edmond Azemi mbanin balancin. 

Loja e shpejtë me shënime nga të dyja palët dhe precizitet në pjesë të parë, bëri që pjesa e parë të përfundojë me 10 pikë epërsi për Pejën, 51-41. 

Çereku i tretë nisi me lojë më të mirë të Sigal Prishtinës, që dalë-ngadalë ulën epërsinë pejane, në disa momente edhe në dy pikë, por sidoqoftë, Peja arriti që me Samirin, e Alban Veselin të mbahet. 

Nisja e çerekut të katërt ishte me telashe te Peja, pasi që qendra Jozo Brkic, e pak më vonë edhe Drilon Hajrizi u ndëshkuan me nga pesë gabime personale. Në këto momente Sigal Prishtina u afrua në 3 pikë epërsi, kryesisht me gjuajtje të lira të Edin Bavcicit dhe me syçeltësinë e kapitenit, Edo Azemi. 

Drama, sekondë pas sekonde

Fundi dramatik i ndeshjes udhëhiqej me pikë të Veselit te Peja, derisa Dardani vazhdonte të shënonte në anën tjetër. 82-80 ishte rezultati 1.30 minuta para fundit të ndeshjes. Dardani barazon nga gjuajtjet e lira në 82-82. Gerti Shima në sulmin tjetër bllokohet nga Gary McGhee, derisa shkaktohet faul ndaj Dardanit, për 82-84. 

Samiri kundërpërgjigjet me treshe për 85-84, 50 sekonda para fundit të ndeshjes. Dardani e bën 85-86 në sulmin e radhës, vetë. Pason një lëndim i Samirit për tu ndalur loja, pas një goditjeje te Bavcic, 18 sekonda para fundit. 

Alban Veseli kthen epërsinë, 87-86, nga gjuajtjet tjera të lira. Pason pushimi për taktikat e fundit nga Sabit Hadzic dhe Boris Kurtovic, 18 sekonda para fundit. 

Të gjithë vrapojnë pas Dardanit, ai pason te Muhamed Hasani i lirë, që dështon të shënojë trepikëshin dhe Peja fiton ndeshjen. 

Barazohen në krye

Samir Shaptahovic me 26 dhe Alban Veseli (rezerva e artë) me 20 pikë kanë qenë më efikasit te verdhezinjtë triumfues, derisa i pakapshmi Dardan Berisha me 36 pikë ishte koshashënuesi më i mirë i ndeshjes. 

Peja dhe Sigal Prishtina, tani kanë bilanc të njejtë me nga 8 fitore e një disfatë. 

REZULTATET, TABELA AKTUALE

Statistikat ekipore

	PEJA	SIGAL PRISHTINA
Çereku i parë	26	21
Çereku i dytë	25	20
Çereku i tretë	15	18
Çereku i katërt	21	27
Kërcime në mbrojtje	20	24
Kërcime në sulm	4	5
Gjithsej kërcime	24	29
Asistime	19	19
Bllokada	2	3
Topa të vjedhur	4	6
Topa të humbur	15	12
Tentime për tre pikë	13/29	7/16
Tentime nga loja	32/61	27/55
Gjuajtjet e lira	10/12	25/28

Statistikat individuale te Peja

1	Samir Shaptahovic	26 pikë	3 asistime	2 kërcime
2	Alban Veseli	20 pikë	7 kërcime	1 asistim
3	Hrvoje Puljko	11 pikë	2 asistime	1 kërcim
4	Gerti Shima	10 pikë	8 kërcime	1 bllokadë
5	Teo Simovic	9 pikë	1 kërcim
6	Jan Mocnik	7 pikë	6 asistime	1 kërcim
7	Drilon Hajrizi	2 pikë	3 asistime	2 kërcime
8	Jozo Brkic	2 pikë	2 asistime	2 kërcime

Statistikat individuale te Sigal Prishtina

1	Dardan Berisha	36 pikë	7 kërcime	6 asistime
2	Edmond Azemi	14 pikë	7 kërcime	2 asistime
3	Jordan Hulls	13 pikë	7 asistime	4 kërcime
4	Blerim Mazreku	11 pikë	2 kërcime	1 asistim
5	Edin Bavcic	8 pikë	6 kërcime	1 asistim
6	Gery McGhee	4 pikë	3 kërcime	1 asistim