Premtime deri në ligën ballkanike

Drejtuesit e klubit të Bashkimit dhe basketbollistët e ekipit prizrenas kanë dalë me premtime të mëdha nga Shtëpia e Bardhë e Prizrenit, ku i ka pritur kryetari i qytetit. 

Përveç përkrahjes, kryetari i qytetit u ka thënë drejtuesve të klubit të Bashkimit se do të shikojë mundësinë për të gjetur mënyra që ekipi të garojë në ligën ballkanike, ashtu që edhe Prizreni të ketë një ekip që garon në ligë ndërkombëtare, kanë njoftuar zyrtarët e Bashkimit.

Bashkimi në dy vitet e fundit ka arritur ta zë vendin e tretë në basketbollin vendor, duke mos arritur t’i bëj ballë Sigal Prishtinës dhe Pejës - që zënë dy pozitat e para dhe luajnë finalet e elitës së basketbollit vendor. 

Gjithashtu, ekipi prizrenas shpreson në përkrahje më të madhe financiare nga Komuna, pasi që nuk ka fituar asnjë trofe mbi një dekadë në basketbollin kosovar, edhe pse disa herë ka luajtur finalen e Kupës dhe ka qenë në finale të Play-Offit.